D. - Su sòtziu vostru operada dae parizzos annos prò promovere su cantu , e a su matessi tempus prò difendere sa limba e sa curtura ligà a su mundu de sa pastoria: cales sunu sas attividades chi sezes mandande a innantis como?
R. - Intantu grazie pro mi aere dadu sa possibilidade de chistionare de su cantu a Tenore. Cumente Sòtziu como semus ammaniande una pariga de progettos de presentare a sos Comunes e a sas Iscolas.
A sos Comunes pro ammaniare rassegnas de cantu e attovios pro chistionare de su cantu a Tenore.
A sas’iscolas, pro s’attoviare sos cantadores de sa vidda e sos insegnantes de musica in modu de chistionare e facher connoschere a sos istudentes sa tradizione de su Cantu a Tenore pro lu mantennere vivu in su tempus.
Attopos regionales, cumbidande a bennere tottu sos Tenores iscrittos a su Sòtziu e a tottu sos appassionaos, pro cantare e chistionare de su Tenore.
Cherimus achere una INTERNET-TV de propriedade de su “Sòtziu Tenores Sardegna” pro trasmittere solu musica sarda (cantu a tenore, cantu a chiterra, sonu de launeddas e atteros sonos de radighina sarda) e chistionare de sos poetas sardos chi suni sos chi nos dana sa linfa pro poder cantare.
Semusu in idea de faghere cantare sos tenores de cada vidda in sos zilleris dedicande un’ora de una die de sa chida in modu chi chie cherede a s’avvicinare a su cantu a tenore lischede inuve nos ascurtare senza bisonzu de essere in subra su parcu vestios de costumene.
D. - Su mamentu prusu importante, puru ca est cussu chi si viede de prus, risurtada s’attoppu de tottus sos Tenores: occannu cando l’achides e inuve?
R. - In custos annos colaos camus fattu attopiu de sos Tenores in sa vidda de Ollolai, Bitti e Seneghe, como semus pessande de fachere 4 attoppos cad’annu (unu in Beranu – unu in’Istiu – unu in s’Atonzu – unu in’Iverru)
D. - Achimus carchi passu issecus: nos amentas cando este naschiu su “soziu de sos Tenores”, inuve, e si vad’appiu carchi fattu distintu chi ada ispintu a piccare cust‘impignu?
R. - S’impigniu vest istau da parte de sos gruppos de cantu a tenore cando nos semmus sortios pro sa prima vorta in Nugoro in sa sala de su cossizzu de sa Provincia, e poi cando in ghennarzu de su 2006 ammus fattu in Ollolai s’attoppu pro costituire su “Sòtziu Tenores Sardigna”. Su fattu distintu este chi su Comune de Ollolai in sa pessone de su Sindicu Efisio Arbau, chi ada cretiu in sa valididade de su cantu a Tenore (e lu ringraziamus) nos’ada pagau sas ispesas notarile de costituzione e in prus nos’ada dau sa possibilidade de tennere sa sede legale de su zòtziu, chi este galu in su Comune in Ollolai.
D. - Cantos sunu sos gruppos “a cuncordu” chi achene parte de su Sòtziu Tenores Sardignia?
R. - Sos gruppos a Tenore chi suni iscrittos a su Sòtziu Tenores Sardignia suni 127, e ustu numeru est sempre in aumentu ca vi suni gruppo novos chi cherene essere iscrittos.
D. - Sas zonas inuve si accattana: sunu unu pacu in tottu sa Sardigna, o b’ada territorios prusu rappresentaos?
R. - Sas zonas prus rappresentas dae sos Tenores suni de sa Provincia de Nugoro (30 viddas) sos atteros si acattana in sa parte nord de sa Provincia de Oristano (12 viddas) - in sa Provincia de Sassari (10 viddas) – in sa Provincia de Olbia-Tempio (5 viddas) - in Ogliastra (5 viddas)
Bisonza de narrer puru chi vi suni medas viddas in cada Provincia inuve si cantada a tenore e non suni rappresentas.
D. - Una cosa distinta este chi in sas diversas zonas venidi mutiu in manera differente: ammentamus calecunu de custos numenes?
R. - Su Tenore in Ollolai venidi muttiu: Huncordu – In Ovodda: Cuncordu - In Mamoiada: Hussertu – In Torpè: Cussertu – In Abbasanta: Cuntzertu In Seneghe: Cuntrattu – In Thiesi: Cunsonu – in ateras viddas: Su Tenore
D. - Tue ses de Ollolai: in bidda tua sa tradissione sighidi vene galu como…
R. - In Ollolai sa tradissione de cantare a tenore est sempre ista viva ca veste zente manna e minore sortia in gruppos istabiles chi cantana, e cando veste s’attoppu de Pastores-Tenores i cad’annu este in su mese de Santu Gavini tottus sos appassionaos sortini pro cantare a Tenore ponendesi a pare cun sos gruppos istabiles
D. - Zitamus puru sos dirigentes, sos chi dana cara a s’attividade: tue ses su segretariu, e poi…?
R. - Su Sòtziu Tenores Sardigna est formau da 15 pessones chi faghene parte de su Cossizzu e rappresentana sas varias zonas inuve si cantada a Tenore. Su presidente este Salvatore Ghisu de Alà dei Sardi. Su vice presidente est Franco Davoli de Orgosolo. Su Segretariu est Antiocru Bussu de Ollolai. Tottus sos chi suni in su Cossizzu faghene parte in gruppos de tenores.
D. - In Sardigna su cantu este meda diffusu, comente uffirmada puru custa presenzia manna de gruppos: però non tottus connoschene comente este cumpostu unu tenore, cales sunu sas differentes voches chi piccana parte a e tottu: lu podes contare e ispiegare a sos ascurtadores?
R. - Su Tenore est sortiu dae 4 cantadores: Sa voche solista chi cantada una poesia in limba sarda, su Bassu (sonu gutturale), sa Contra (sonu gutturale), sa Mesu Voghe (sa campanedda chi s’intendede allargu). Cando si cominzada a cantare si faghede prima “s’isterrida“ e poi “sa zirada“ chi est sa “boghe ‘e notte“ unu cantu a sa seria, poi su cantu a sa lestra, sos muttos (chi suni cantos de amore), poi si cantada a boghe ballu.
Non tenende musica iscritta sa voghe cando cominzada dada su puntu a segundu cumente si sentidi, chi podere essere bassu oppure prus artu e su Tenore sighidi pigande su puntu dassau dae su cantadore.
D. - Si nada, in sos libros, in sos giornales italianos, chi cussu a cuncordu este su cantu de sos pastores, de su mundu de sas campagnas: cus’arte naschidi duncas in sos cuviles, pro alligrare sos mamentos de pasu dae su tribagliu. E sos atteros mamentos e locos inuve si pesavada su cantu?
R. - A tempos nostros non best pius distinzione tra sos chi cantana a Tenore. Cantada su Dottore - Su Mastru ‘e Muru – S’Ingenieri – S’Operaiu – S’avvocau, s’Istudente e puru su pastore, proite ustu modu de cantare appartenede a tottus sos sardos. Sos locos inuve si cantada suni o in calendario pro estas, oppuru si cantata in modu ispontaniu inue nos accattamus. Si cantada in sos zillerirs, in sos’ispuntinos, matrimonios e cada ora er bona pro cantare. Sos i istudiana in s’universidade de Casteddu e de Sassari, cantana cando si sortini in sos andidos de sas facoltades e in sa domo de s’istudente.
D. - Un’arte e una curtura de gabale, tantu chi carchi annu achede ad’appiu finsas su riconnoschimentu de s’Unesco, s’importante organizzazione mondiale chi ada sa sede in Parigi…
R. - S’Unesco ada sede in Parigi, ma este naschidu in Londra in su 1945, un cussu proposito de mantennere sa paghe e su rispettu de sos dirittos umanos e de si occupare de sos problemas economicos, culturales, sociales, de educazione e sanidade. Pro custu riconnoschimentu da parte de s’Unesco a su cantu a tenore cumente patrimoniu orale intangibile dess’umanidade, deppimus dare cara a Francesco Licheri chi este istadu Presidente de sa Provincia in cussos annos, ca ada presentau su progettu de su Pastoralismo in Sardignia a s’Unesco e cada postu in mesu su cantu a tenore cumente modu de vida sociale in su mundu agro-pastorale. Pro cussu este istadu premiadu ca este unu modu unicu de cantare in tottu su mundu.
D. - Torramus a sas cosas de como: comente “Sòtziu Tenores Sardignia“ ite sezes ammaniande? Ite azzes in prope?
R. – In Capidanni de su 2013 semus in idea de ammaniare unu attoppu in Orgosolo, cumbidande tottus sos tenores iscrittos a su Sòtziu Tenores Sardignia e tottus sos chi tenene in coro su cantu a Tenore.
Gasi nos podimus vier e connoscher tra nois e chistionare cun dibattitos de tottus su chi tenimus in pensamentu
Ustu attoppu si riussimus lu mandamus in diretta in Internet-TV
Tenimus unu situ internet chi este: tenores.org, inuve iscrivimus tottu sas notissias de su cantu a tenore.
Bos saludo cun coro: Antiocru Bussu – Segretario de su Sòtziu Tenores Sardigna
http://www.tenores.org/
