Su sette de aprile est oe (cussu Aprile, mi naraiat Mama, ki nanki aiat fattu morrer sa mama de frittu supra ‘e sa coperta!) de su dekessette (ma kin sos duamiza postos innanti peroe!), appo gana de iscriere in hoke, sende sa e duas bortas. (esummaria! Itte paraulas attropeadas mi sun’ bessidas!)
Duncas, aiamus nadu ki s’istoria nostra l’aiant iscritha «a su cua cua». Ma no’ fit a zocu!
1- Sempere, lezzìa ki fimus sos urtimos de su mundu in calesisiat cosa. Itte ascu ki minde fakiant!
2- nanki fimus […]
Abbarra a bellu, Sardulezzidore! Fippo iscriende, como, tottu sas cosas maccas ki mi torraiant a dainanti, ma sicomente so’ idende ki sunt medas abberu, dezzido como a no’ bi la fakere s’isterrida issoro. At a esser mezus de goi: cada orta li ponimus una kistione e bidimus de l’abbatticare ene ene, si bi resessimus. Ettando, ponimuli sa kistione de su lumeru unu e andamus a li rispondere.
1- Sempere, lezzìa ki fimus sos urtimos de su mundu in calesisiat cosa. Itte ascu ki minde fakiant!
Comente fakiamus a esse’ sos urtimos! Ja fit ladinu ki no’ fit a beru!
A Orotteddi, su Nurake ‘e Calone, k’est in d’unu locu ki li resurtat artu meda (creo unos seskentos mettros), est postu nessi trekentos mettros proppriu a susu de Sa Travessa: su caminu ki dae Nuoro curret a Maccumere; e diffattis dai cue sutta pro idere a Calone, toccat de arzare sa conca in artu abbaidande su kelu! Jeo, cussas battoro, kimbe o mancari sette ortas (prima de lomper sos noe annos) ki ke so’ picadu a susu de su Nurake, sende ki in domo ‘e Mannoi aiant sos campos seminados a pattatta o fae accurzu a inie (de tricu no’ mind’ammento), jeo, fippo nande, arreaia ispantadu abbaidande in cada kirru e allargu meda finzas a Monte Gonare, idende tottu cussas terras e cussos montes e cussorzas affakke! Intendia intro ‘e su coro custa mannaria, custa ispezzie de cosa ki lompiat a kelu, ki mi fakiat de importu e poderosu, supra e tottu su ki mi fit innanti! No iskia nudda de Nurake, solittantante ke su lumene! No iskia nemmancu si fit cosa ezza o cosa noa! Duncas (e truncas), custu nikele forte ki m’intraiat in conca, ke moiat proppriu dae cussa abbaidada ki colliat tottu su mundu addainanti lompendemi finzas a pes! Cussa ispezzie de mannaria deppet esser istada cosa essida dae s’anima, ki mi fit nande: abbaida cuke, e cussivera cantu mannos fidis!
E zeo custas paraulas, ki no’ fint paraulas, ma fin predas ki mi brusiaiant sos pessamentos! Embeh, jeo mi las appo mantesas a intro, peri fattu a mannu! Sempes cokendemi e iskidandemikke dae su sonnu! Ja est pro cussu ki non’ bi los appo mai crettidos cussos maccarrones ki naraiant ki fimus ultimos! Manc’abbidea puru!
E, duncas, torrande a sa kistione ki amus cominzadu, pro mene CALECCUNU NOS FIT CUANDE SA VERIDADE! Ca su Nurake fit cosa ordiminzada cun àstria manna! Ardimentada dae zente ki manicaiat pane dae sette furros! Manna e forte! Unu Nurake no’ fit una domo, ki kiesisiat la podiat fakere peri serrande sos ocros, ca su prozettu fit belle e istikkidu in mente. Pro su Nurake bi keriant Mastros meda, pro lu pensare ene e prezzisu, prima ‘e tottu. Poi bi keriat maistanza ki aeret pothidu cumprendere su ki aiant in mente sos Mastros e ki esseret istada capassa de fakere su fraicu de tottu sos ambientes mannos e minoreddos e cun arte a los ligare appare pro ki aeret appidu UNA VIDA PRO SEMPERE, cussu bette monumentu! E sos piccaprederis no’ deppiant esser Mastros issos puru? E sos secaprederis tando? Ki andaiant a sos montes pro ke ocare sa preda de sa mesura ki serbiat, cada orta sempes cambia, e capassos de sikire sa ena, no’ deppiant essere Mastros? E s’atteru muntone de fainas a inghiriu de tottu sos prozettos minores ki bi keriant pro fakere no’ solittante ke Mannu unu Nurake, ma prontu a ke manicare tottu sos tempos benidores? No’ las deppiant sikire atteros Mastros? Mannos?
Ettando! Eh, mi! Como so’ frastimande ai cussos conkimaccos de innanti!
Si sunt capassos, de nos presentare NESSI DEKE POPPULOS ki appant fattu 8.000 monumentos mannos e mai inkidos comente a sos Nurakes, ma peri isvariados i’ su trattu e s’impreu, comente ki sient fattos de una sola unidade o de medas e ki sien gai etternos, beh, semus de accordu a narrere ki: oh zente, intendide!
NOIS SARDOS NO’ SEMUS SOS PRIMOS! MA SOS PRIMOS IN MESU E ATTEROS DEKE!
SINONO! KERET NARRERE KI ABBARRAMUS PRIMOS DAE SOLOS!
Comente a sempere! Attrekke urtimos!
Beh, infadadu minde fippo de sas faulas manantiàles de CUSSOS MACCARRONES!
mikkelj