Publicada dae pagas dies, est giai sighida dae belle 800 impitadores de facebook: semus faeddende de sa pàgina “Amigos de sa limba sarda comuna”, un'idea nàschida dae sa “Sotziedade pro sa limba sarda” e dae su presidente suo Diegu Corràine. Sas finalidades sunt sas chi sighint:
1. aunire sos chi sunt in favore de sa Lsc
2. afortire sa presèntzia e s'impreu de sa Lsc
3. fàghere connòschere sas règulas de sa Limba Sarda Comuna
4. organizare presentadas de sa Lsc
5. organizare Cursos pro imparare sas Règulas de iscritura de sa Lsc
6. organizare addòvios pro chistionare e crèschere su lèssicu e sa terminologia de sa Lsc
7. organizare cunfrontos subra de s'istandardizatzione de sas limbas natzionales emergentes
In sa pàgina si podent bìdere sas testimònias de professores (Pàula Coronas, Sara Firinu, Giuanne Luisu Stochino, Diegu Corràine), giornalistas (Sarvadore Taras, Màuru Piredda), musicistas (Dàriu Piga), istòricos (Frantziscu Casula), dutores (Giagu Ledda e Vissente Migaleddu), funtzionàrios amministrativos (Cristianu Becciu), dirigentes forestales (Zosepe Delogu) e apassionados de cultura sarda (Antoni Boe Chicone).
Pro sos “amigos” sa norma iscrita comuna est una bandera de sos sardos e unu cumplementu de sa limba orale e de sas variedades locales. Una manera pro fàghere de su sardu una limba normale.