Sa fantasia de sos pitzinnos nos lassat semper a buca aberta, ca curret in milli àndalas e sighit milli imbentos. E gasi etotu oe, in Oroteddi, sos pitzinnos de sa tertza e de sa cuarta elementare ant lassadu chi a faeddare e a iscrìere siat istada s'imbentoria issoro. Pro more de su laboratòriu ammaniadu dae s'Ufìtziu de sa Limba Sarda de sa Provìntzia de Nùgoro, sos piseddos ant giogadu a iscrìere in sardu. In antis ant chircadu de ammentare paràulas chi lis colaiant in mente e a pustis cun sas matessi paràulas ant iscritu bator contos: unu comintzat cun sa fura de una berbeghe a su pastore Ninu, un'àteru faeddat de sa gatu Dàriu chi at tènnidu unu pugione, s'àteru de unu compare chi fiat andadu a comporare sos “culurzones” e de unu re e de una reina chi s'istimaiant. S'ùrtimu contat imbetzes de unu pugione chi s'est “pèrdidu in sa nèula bianca che su late”.
Una bella die de laboratòriu in sardu, pro s'allegria de pitzinnos, maistras e operadore de s'ULS.