CASTEDDU. Nch'at coladu prus de unu mese dae sas eletziones, ma oe su Cussìgiu regionale s'est assemidadu cun in agenda sa giura de sos sessanta cussigeris eletos, de sos assessores e de su “guvernadore”, e s'eletzione de su Presidente de s'assemblea. Sa setziada est istada presèdida dae Màriu Floris finas a cando no est istadu eletu su Presidente de su Cussìgiu. A pustis de tres votatziones (sa de tres rechediat una majoria sèmplitze) bi l'at fata Giuanne Frantziscu Ganau, giai sìndigu de Tàtari e dirigente de su partidu democràticu. B'at de nàrrere chi su sutzessore de Clàudia Lombardo at leadu duos votos in mancu cunforma a sos cussigeris de tzentru manca chi ant votadu (nd'aiat dèvidu leare 36 imbetzes de 34). Est possìbile chi custu resurtadu siat determinadu dae sos critèrios de sèberu pro formare sa Giunta, ma finas dae carchi “dolore de matza” ligadu a sa “chistione morale”. S'opositzione de tzentru destra at votadu imbetzes a su nugoresu Pedru Pittalis (chi at a torrare a ghiare su grupu de Forza Italia). Sa setziada imbeniente su 27 de custu mese, cando s'at a acumprire s'ufìtziu de presidèntzia cun s'eletzione de sos duos vitzes de Ganau e de sos duos cuestores.