OTZANA. Cun una reghente delìbera de Giunta, e a pustis de sa proposta de s'Ufìtziu limba sarda de sa bidda, sa comuna de Otzana at detzisu de aderire a sa “Die internatzionale de sa limba materna”, proclamada dae s'Unesco – dae su 1999 – e festada ogni 21 de freàrgiu cun sa punna de promòvere sa diversidade linguìstica e culturale e su multilinguismu. Su progetu presentadu dae s'Ufìtziu proponet momentos de promotzione de sa limba sarda in s'iscola otzanesa e sa difusione de unu documentu de sensibilizatzione intituladu “Prus limbas pro fàghere a mannu” predispostu dae s'operadore linguìsticu e indiritzadu a sos babbos e a sas mamas de sos alunnos.