OTZANA. A pustis de su de Torpè de sa chida colada, sighint sos addòbios ammaniados dae su “Sòtziu Tenores Sardigna” in ammentu de Piero Sanna e in intro sas tzelebratziones de “Sa Die de sa Sardigna”. Finas in sa bidda de sas caratzas s'at a comintzare a mangianu cun unu laboratòriu cun sos dischentes de s'iscola in sa sala polivalente de carrera Lussu e cun sa ghia de su tenore otzanesu “Santa Maria”. A sas chimbe e mesa de borta de die (in su matessi logu) sa cunferèntzia intitulada “In pratza de crèsia, càntigos sacros e profanos”. Ant a abèrrere sos traballos su sìndigu Giampaolo Marras e Antiocu Bussu pro su sòtziu. Ant a sighire sas relatas de Ignazio Macchiarella (Universidade de Casteddu) e de Roberto Mlleddu (Cunservatòriu de Casteddu). In fines sos càntigos de sos tenores “Amici del folclore” de Nùgoro, “Sas Murtas” de Pasada, “Sa Niera” de Patada, “Santa Maria” de Otzana e su cuncordu “Chimbe cuintales” de Ovodda.