pessandebbei
El dai meda ki aia gana de ponnere supra ‘e sa tastiera calki pistikinzu ki fit in conca currendemikke, pro l’innittare in custu locu a uve furriat peri zente de Orotteddi.
Proitte poi mi soe ponende a faeddare de Orotteddi no’ s’iskit! Ca jeo mancu náskidu bi so’! Ma, Babbu e Mama ja fint náskidos in ie. E poi, mi soe peri abbizadu ki i’ su campusantu (su kirru ezzu) fit prenu (nessi su mesu) de tumbas uve fint e b’at galu Tzoroddos meda! Kissai, una orta ant a esser istados meres de Orotteddi!? E poi, su faeddu ki so’ istrokkende como, lu soe furriande de gai, ca mi paret de l’assemizare a cussu (ki m’ammento allargu meda, meda) de Orotteddi. Ma, ja lisco ki no “es” (in hokke poi no’ l’appo postu sa “t” a sa fine, comente nanki si deppet fakere cando s’iscriet, ca calki orta mi paret mezus de goi!) faeddadu e mancu iscrithu ene. Ma, sa neke este de sa sorte ki m’at dadu cussu corfu malu imbolandemikke a Continente, a poi de esser’abbarradu pezzi tres o battoro o kimbe annos in Mussinzua. Ej, ej! Ja b’este Mussinzua puru! Beh, puru, no’ diat esser mancu sa paraula zusta, ca Mussinzua enit peri prima, ghirande dae sa travessa! Sa travessa. Da uve s’idet su Nurake ‘e Calone! Ki jeo mil’ammento postu de iscala mai ida in atterue. Pro cussu aia pedidu su piakere, a Vissente Santone (ki de custas cosas nd'iskit meda ene), de mi mandare sa trassada ki aiat fattu isse pro sa tesi (creo i’ su 65-67), ma galu no’ bil’appo ida. Ki poi, i’ Sa Travessa proppriu, b’est peri cussa Cantonera de Sennora Marta! A boll’ammentades? Uve diant aere accattadu cussa preda ‘e láccana uve fit iscrithu «FIN NURR» ki, mi paret galu, no’ s’iskit láccana de kie fit!
Beh, custa est istada un’ispezzie ‘e presentada fatta ki’ sos pes! Ja mil'ades a perdonare. Peroe, su ki bos appo a narrere (si mi lu permittint sos meres de custa domo, e cando nde app’aer gana) est cosa ki no’ b’intrat nudda kin Orotteddi e Mussinzua, ma at a ferrer tottu sos Sardos!
Ei, ca dae tempus meda, istudiande comente soe s’Istoria ‘e Sardinna, mi so’ abbizadu ki l’ant iscritha no kin sas paraulas "ma kin sas faulas"! E, m’ata aggradare de bos narrer comente las fraicana custas faulas. E proitte, las fraicant e las sunu fraicande peri oje! Ei, ja amus a bidere!
mikkelj
