OROTEDDI. Custu martis 45 pitzinnos de sas iscolas elementares de sa bidda ant pòdidu partetzipare a unu laboratòriu linguìsticu organizadu paris cun s’Ufìtziu de sa Limba Sarda de sa Provìntzia de Nùgoro. Su laboratòriu, gestidu dae Ànghelu Canu de s'Ufìtziu limba sarda de s'Arta Baronia, est bistadu partzidu in duas partes. In sa prima, gràtzias a unu contu àudio-vìdeo, sos pitzinnos ant bidu a ite serbit sa limba sarda: non petzi pro faeddare de “cosas sardas” ma finas pro afrontare cale si siat argumentu comente si faghet cun sas àteras limbas, a comintzare dae s'italianu. In sa segunda ant imbetzes pòdidu cunfrontare sa grammàtica e s'ortografia sarda cun s'italiana. Ca finas in sa limba de Dante non semper su matessi grafema o unione de grafemas si leghent a sa matessi manera (Ànghelu at fatu unos cantos esèmpios, comente su de “gli” e de “glicine”). Su tempus benidore de su sardu, duncas, paret chi colet dae sos pitzinnos, capatzes de bi pònnere s'aficu chi bi cheret finas in pagas oras de istùdiu mesturadas cun su giogu.