Cheres iscrìere in sardu e pensas de no àere sas cumpetèntzias netzessàrias? Non b'at perunu problema! Dae internet podes iscarrigare su chi ti serbit pro evitare de fàghere faddinas. In antis de totu tocat de dare una ograda a sas normas de sa Limba sarda comuna, est a nàrrere sas règulas pro impitare su sardu in s'iscritura (ca nemos t'impedit de sighire a faeddare cun sa variante de sa bidda tua). Las agatas, a manera òvia, iscritas in sardu. Ma si ses comintzende e no est totu su chi cumprendes b'est finas sa versione in italianu. In prus podes pompiare su glossàriu pro agatare (mancari chi non bi siant totus) sas paràulas bortadas in sardu. In fines, cando pensas de èssere prontu a iscrìere ti podes fàghere agiuare dae su Cros, su curretore ortogràficu. L'agatas in lìnia, ma lu podes iscarrigare e insertare in s'aplicativu pro iscrìere in s'elaboradore tuo. Pone mente però: bi cheret Open Office (o Libre Office) ca Word de Microsoft no est a "còdighe abertu". Si pensas chi custas informatziones siant ùtiles faghe connòschere custu artìculu cumpartzi-lu in sas retes sotziales (Facebook, Twitter e àteras).