Giòbia mangianu in sa Comuna de Oroteddi b’at a èssere sa prima riunione pro ordimingiare sa manifestatzione pro alabare a “Preide Merche”, su preìderu oroteddesu chi in su 1929 at iscritu e publicadu una monografia in pitzu a sa bidda sua e nòdidu pro s’impignu suo a dare fama a s’istòria e a sa cultura sarda.

S’Amministratzione Comunale, paris cun s’ULS de Nùgoro, at a aprontare una diada de istùdiu in pitzu a Bobore Merche, pro more de su finantziamentu àpidu dae su (ex?) Servìtziu Limba e Cultura Sarda cun sa L.R. 14/2006, art. 21, comma 2, lìt s) (annualidade 2013), chi at permìtidu de ordimingiare manifestatziones in totu sa Sardigna pro alabare persones nòdidas a incuru de Istitutziones Pùblicas locales.

S’idea naschet fintzas pro more de una donatzione fata a sa Comuna dae sos de s’erèntzia de Merche: intre custos documentos b’at duos cartulàrios cun 260 otavas in rima chi contant s’istòria de sa Sardigna dae su tempus pre-nuraghesu a su tempus de mesu, unu traballu de gabbale chi sa giunta bolet avalorare pro mèdiu de sa manifestazione totu in sardu, de sa publicatzione de custos manoscritos e de sa digitalizatzione informàtica de sos iscritos originales, a manera de ispartzinare s’òpera e sa fama de “Preide Merche” non in Oroteddi ebbia, ma in totu sa Sardigna e in Itàlia.

S’avisu fatu dae su Sìndigu Nannino Marteddu in Facebook at àpidu una resèssida manna, cun milli cumplimentos e cummentos a galavera: mustrant s’orgòlliu de una comunidade, sa oroteddesa, pro sos personàgios nòdidos suos e sa gana de dare lugore a una bidda e sa gente sua.