Sas eletziones regionales s'ant a tènnere su 2 de martzu de su 2014. 60 cussigeris noos ant a èssere seberados, paris a su “guvernadore”, pro sa legisladura chi s'at a perlongare finas a su 2019. In sa legisladura chi est finende sos cussigeris sunt 80. Duncas ant a èssere 20 in mancu. No est s'ùnica novidade.

Cun sa lege eletorale noa no amus a àere su “listinu de su presidente” chi garantiat s'eletzione a unos cantos cussigeris imbenientes sena chircare preferèntzias. In prus non b'ant a èssere sas duas preferèntzias (una pro unu candidadu e una pro una candidada) e, in fines, amus a àere duos livellos mìnimos de pertzentuale netzessària pro elègere: sas coalitziones devent segudare su 10%, cando chi a sos partidos current cun sa lista issoro est bastante su 5%. Pro sas listas chi abarrant in intro sas coalitziones non b'at, imbetzes, livellu mìnimu pertzentuale (mancari chi s'ant a contare sos votos assolutos).

Su prèmiu de majoria (chi at a mudare sa rapresentàntzia proportzionale) est de 33 cadreas. Ma non b'at a èssere si chie binchet nche colat su 60% o no arribat a su 25%. In prus, sa diferèntzia intre sa prima coalitzione e sa segunda devet abarrare intro su 25 e su 40%.

Sos cullègios eletorales ant a èssere 8. Sos cussigeris de su cullègiu de Nùgoro (chi interessat sos eletores de sa Barbagia) ant a èssere 6.

Sos partidos ant a dèvere presentare sas listas de sos candidados issoro coladas sas 13 dies dae sa data de publicazione de su decretu de su Presidente de sa Regione.

Finas a como amus 5 candidados a guvernadore. Ugo Cappellacci pro su tzentru-destra; Frantzisca Barracciu pro su tzentru manca; Michela Murgia pro “Sardegna possibile”; Màuru Pili pro “Unidos” e Predu Frantziscu Devias pro su “Fronte indipendentista unidu”. Galu non s'ischit comente s'ant a collocare Irs, Sardigna Natzione e sos “soberanistas” de Maninchedda. 

Labarbagia.net est sa boghe de su territòriu nostru. Duncas est a dispositzione de sos candidados pro fàghere connòschere ideas e programmas a sos letores. Ma, mascamente, est a dispositzione de sos tzitadinos de sa Barbagia chi cherent nàrrere su chi pensant e, finas, fàghere preguntas a sos “polìticos” chi non nos mancant.

Iscrie-nos a redazione@labarbagia.net