Gigi Sanna, nàschidu in Abbasanta s'8 de santandria de su 1939, est su candidadu de su Movimentu Zona franca. Laureadu in Lìteras e Archeologia at insegnadu latinu e grecu in su liceo “De Castro” de Aristanis. In sa matessi tzitade at fatu su cussizeri comunale (dae su 1981 a su 1995) e finas su vice sìndigu (dae su 1989 a su 1990). Dae su 1987 a su 1990 est bistadu finas cussizeri de amministratzione de sa Sfirs, sa finantziària regionale. Curret cun una lista ebbia, indipendente dae sas coalitziones mannas, a diferentzia de àteros “zonafranchistas” chi, invece, ant seberadu de istare intro de su centru destra.

Pro Sanna sa zona franca integrale est sa solutzione a pustis de «barant'annos de polìticas econòmicas chi ant creadu solu depressione pro sa Sardigna». Sa proposta est accumpagnada dae sa netzessidade de àere una Agentzia sarda de sas bintradas pro contare, regogliere e costoire sos tributos. Insertare, duncas, sa Sardigna in su còdice doganale comunitàriu comente chi esseret territòriu extradoganale. Ma su programma de su movimentu non tocat sa fiscalidade ebbia. S'amparu e s'avaloramentu de s'identidade sarda devent èssere bogados dae s'amministratzione tzentrale; su turismu devet èssere sustenìbile; s'ètica devet èssere posta in antis de totu istesiende sos polìticos dae s'amministratzione de sa sanidade. Ma finas continuidade territoriale, formatzione, gherra a sa povertade e infrastruturas.