MAMUJADA. Custu sàbadu s'ant a tènnere duos addòbios ordingiados dae su “Sòtziu Tenores Sardigna”. Sighende s'àndala sestada dae sos primos duos (su de Tiesi e su de Pasada) como tocat a Orosei e Mamujada. Ambas duas sas initziativas ant a sighire sos matessi oràrios, duncas tocat de seberare. In su de Mamujada amus a àere unu laboratòriu cun sos dischentes de s'iscola mèdia e cun “Su Hussertu” a mangianu (a sas 11); a borta de die (dae sas 17,30) s'at a tènnere imbetzes sa cunferèntzia intitulada “A sa mamujadina. Cussertos de eris e de oe, comente mudant faeddu e càntigu”. A pustis de sos saludos de su sìndigu Gratzianu Deiana, de su presidente de sa Pro Loco Antoni Mele e de su vitze presidente de su “Sòtziu” Franco Davoli nd'ant a faeddare su giornalista Mauro Piredda e s'insegnante de su Cunservatòriu de Casteddu Bustianu Pilosu. A sighire ant a cantare sos tenores “Garteddesu” de Garteddi, “Sos Coroneddos” de Bultei, “Santu Pretu” de Lòcula, su “Cuncordu Ortigalesu” de Bortigale e sos meres de domo de “Su Hussertu”.