Una rundine libera in s'aera
volad' a manu tent' a su eranu
attinde sa notissia sincera.
Marzu su mese de s'annu metzanu
cantada e si dondola serena
est de Santu Zuseppe su mmanzanu.
Su primu sole liberadu appena
rundine in s'impossibile s'amore
perenne cuile in domo anzena.
Volende pro su Santu est' in onore
ego l'osservo e sò testimonzu
de su eranu est su primu sapore.
Ennida pro amor' e pro bisonzu
a ponner nidu pobulare in cue
zingara torra de nou in' attonzu.
Meda segreta no narad' a ue
migrare est sa sua passione
de crios segus semper'una nue.
Si torrad'in attera istajone
si podio a li dare in regalu
asilu nidu e protezione;
Annos mios all'ammirare galu.
Salvatore Frau